Part Six- "Ek Lotey Ki Aatmkatha"

Kapil Sharma

College ka mahaul to mujhey dekhtey hi raas aa gaya, charon taraf yuva ladkey ladkiyan they, sabhi josh se aisey bharey huyr they jaisey aaj hi duniya badal dalengey. aur fir woh ladka jiska naam tha......ummmmm, rajiv.... nahi, sunil, kayum,  nishant.... abhi yaad nahi lekin bhala sa naam tha. aur sabsey badi baat thi ki woh ek theatre group me kaam karta tha. group me kaafi saarey ladkey ladki they, aur woh mujhey yun utha laaya tha ki, woh log abhi jo natak kar rahey they usmey lotey ka bahut bada role tha.

lijiye, bina koi mehnat kiye mei actor ho gaya tha, mera role us natak me kitna bada tha, iska andaaza aap is baat sey laga saktey hain ki, jab mujhey group se introduce kar aya gaya to sabh key chehrey khil gaye they, kyunki unkey natak ka rehersal usek lotey ki vajah se ruka hua tha, aur woh sab chahtey they ki kahin se unkey haath koi lota lag  jaye. group ki maali haalat bahut achchi nahi thi isliye woh lota khridney ki jagah kahin se lota jugadney ki soch rahey they, aur ek chamatkaar kitarah me unkey aath lag gaya tha. "amazing hai yaar, kitna shine kar raha hai na" "par shakl se to antic lag raha hai" yeh unkey pahley sambodhan they jo merey liyethey.

agar mey yeh kahun ki mujhey natak ka hissa banney se koi romanch nahi hua to yeh galat hoga, sach kahun to merey liye to yeh bahut hi aaramdayak break tha, din bhar mei group ke floor manager debu ke bag me rahata tha, phir sham ko unkey saath rehersal me hissa leta tha, aur raat ko debu ki computer table par rahata tha.

un logon ko bhi mere tedhey baithney ki aadat ka pata chal gaya tha, lekin us par kisi ne koi eitraaz nahi jataya tha, balki meri suvidha ke liye woh mujhey ulta khada karney lagey they, aur sach kahun to mujhey ismey koi problem nahi thi. woh log mujhey apney naatak ke aur kirdaron ki tarah nhi, utni hi ijjat detey they. badey prem se rakhtey they, sabsey badi baat yeh thi ki unmey koi ek director nahi tha, balki woh sab hi experienced they, aur woh sabhi natak me koi na koi positive contribution kartey hi rahatey they.

par kul milakar meri zindgi ka yeh hissa bahut badhiya gujra hai, naa khaney ki parvaah, na soney ki fikar, in bachchon me samaj badlney kajo josh dikhai deta tha, woh mujhey apney com. naseer ke ghar ki yaad dila deta tha, aap soch kar hans rahey hongey ki lota imotional ho gaya, lekin sach kahun to in bachchon ko dekh kar to koi bhi imotional huey bina nahi rah sakta. khair in bachchon ne badi shiddat ke sath mehnat karkey apna natak taiyaar kiya ,lekin jab inka show hona tha ussey theek pahley kuch bhayanak hua aur suna purey desh me dangey feil gaye. natak to door ki baat hai, logon ka ghar se niklana mushkil ho gaya tha. shayad koi maszid giraney ki baat thi, ya aisa hi kuch tha, kyunki in logon ki baatcheet me aisey fikrey aatey they ki lagta tha ki kisi khas party ka to plan hi tha ki woh maszid gira dengey, ya aisa hi kuch........ujhey zyada pata nahi hai, mei to hindu musalmaan dono hi ke yahan raha hun, mujhey to dono ki hi fitrat me koi khas farq nazar nahi aaya, koi achcha 'insaan' laga to woh khud ko nastik kahata tha, kahata kya tha prachaar karta tha nastikta ka aur kahata tha, bhagwaan ko maanney waaley bevakuf hotey hain (yeh mere shabd nahi hain) ho sakta hai log bevkuf naa ho balki bahut chalaak hon, aur dossron ko bewakuf bananey ke liye bhagwaan ko manney ka drama kar rahey hon, kyunki jaisey aap bhagwaan ko mantey ho ussey to  yahi lagta hai.

chaliye, mei fir bhatak gaya tha (aadat ke anusaar) aur aapney bhi nahi toka(kyun) to un logon ka naatak nahi ho saka, aur merey actor ban-ney ka ek mauka, aakhiri mauka bhi chala gaya, Debu ne mujhey apney kamrey ki almari ki chat par rakh diya aur bhul gaya, katai bhul gaya, ho sakta hai usney fir natak kiya hao, lekin aisa koi natak naa kiya hojismey kisi lotey ki zaroorat ho, aur me bhi dunia jahan ko bhul kar us almari ke upar dhul khata raha, fir jaaney kitney samay baad shayad diwali ya durga puja ke samay safi kkartey huye mujhey nikala gaya, lekin mujhey dho ponch kar istemaal me laaney ki unki koi mansha nahi thi, kyunki unhoney mujhey kisi kabadi ko de diya jo mujhey apney borey me daal kar dukaan par le gaya, jahan se mujhey bina daam lagaye apney ghar le gaya.

kabadi ka ghar kuch zyada bada nahi tha, shayad kiraye ka raha hoga, aapmey se shayad zyadatae log nahi jaantey hongey ki ek kabadi kamai kaisey karta hai, aakhir woh aapka kabad kharidkar le jaata hai,to usye ismey kya haasil hota hai, darasal ek kabadi ke har rahkar is baarey me mujhey bahut kuch pata chala hai, lekin woh sab masaley aapkey kaam ke nahi hain, aap bas yeh samajh lijiye ki ek taraf kabadi hota hai jo aapsey samaan kharidta hai,to aagey woh bhi woh saara saaman kisi ko bechta hi hai, merey maamley me aisa nahi hua tha, kai baar jab kabadi logon ko aapsey kharidey huey kabaad me koi cheez pasand aa jaye, to woh cheez aagey bechney ki jagah usey apney paas rakh letey hain, jaisy mujhey rakh liya gaya tha.

mere naye maalik yani us kabadi ne meri keemat smajhi aur mujhey apney paas rakh liya. ab aap sochengey ki mei aapko apney naye maalik ke baarey mei kuch bataunga. ji nahi, bilkul nahi.

jis din mujhey woh apney ghar laaya uskey teesrey hi din, usney aapney doston ke saath daru pee, pani jahir hai mujhmey bhra gaya hoga, fir rat mei kisi samay jab daru khatam ho gayi to  aarop, pratyaarope ka daur aaya, aur usi me kisi ne is saarey gulgapadey ke pichey mujhey doshi thahar diya, fir mujhey to kuch samajh hi nahi aaya ki kya hua, kabhi koi mujhey utha ke fenk deta tha to, dusra mujhey sambhal ke rakh leta tha, meri umra bahut ho chali thi, mera jarjar badan itna utpaat nahi jhel paya, aur ek jagah se chil gaya, woh sharirik chot kam aur mansik chot zyada thi, kahan to mainey yeh socha tha ki jiskey paas bhi mei rahunga uski zindgi behtar banunga aur ab daaru pikar jo jhagda hua usney mujhey apney jeevan ke antim raastey par laa khada kiya tha.

kya yahi hai tumhari manviyat, isi ka dambh bhartey tum khud ko shreshth nasl mantey ho, ek bejuban lotey par itney atyachar to jaanvar bhi nahi kartey.

subah uthkar us kabadi ne mera muayana kiya aur mujhey apney jholey me daal lia, jab woh dukan par pahucha to uskey paas bechney ke liye kuch tha........

uakey baad kai hathon se hokar gujarta hua mei is factory mei aaya hhun, aur apney galaye jaaney ka intzaar kar raha hun, jaaney meri dhatu ko galaney ke baad yeh mujhey kis shakla me dhalengey. leki yeh to tay hai ki meri niyti nahi badlegi, mei unhi nashukrey, haivan kahey jaaney ke kabil insaano ke kaam aunga.

mera aapko apni aapbeeti sunaney ka maksad bas yahi tha ki sudhar jao abhi waqt hai, aur mujhey aawajein aaney lagi hain, lijiye, meri kahani aur yeh zindgi khatm hui, shayad aagey aapsey kisi aur roop me mulaquat ho. Alvida.............

                                                                     END

Please Feel Free To Give Your Comments and Suggestions.